好白相夜饭花开胭脂香

好白相

《夜饭花开胭脂香》

墙角斜阳，夜饭花香；

胭脂起舞，风染其香。

小辰光一直叫伊夜开花的，因为晓得伊是夜里厢开，日里太阳出来，就收起来了。

现在再晓得，伊还有一个名字，叫夜饭花；伊甚至于还有一只英文名字：Four0’clockflower，四点花，好记，迭个花是下半天四点钟，烧夜饭前头开的。

花名侪迭能起，几化接地气呀，通俗易懂。

勿像前两天新认得一种花，绿颜色的枝条上，结满一粒粒红颜色的小果子。长得倒是好看，有特点，就是名字难记，叫商陆。

辣末生头一听，还以为是“双鹿”，弄得像从前上海一只冰箱牌子；后来再晓得，商是商量，商讨；陆是一个个陆续跟好仔。

商陆，指密密麻麻的果子像煞是排好队聚勒一道，商量点啥事体。起名字的人一定是个啰索的。

夜饭花平常，角角落落随便长，倒是有好颜色，大多数侪是紫红的，像胭脂，所以，有辰光也叫伊胭脂花。

小辰光欢喜伊，一是因为伊结的果子，黑赤赤，硬结结，表面有横过来竖过去的纹路，像小地雷；又加上地上随随便便拾拾就一大把，是大热天里小朋友勿花铜钿的白相官；二是因为夜饭花长得像小一号的喇叭花，摘两朵下来，轻轻叫捺花蒂跟花掰开，分离，却留细细的花芯连着小小的花蒂与长腰腰的花；花蒂塞进耳朵里，花挂勒外头，就是一副随风起舞的胭脂耳环了。

从前辰光简简简单的快乐，现在翻出来想想，还是让人开心得心别别跳。

沪语解释

四点：四点钟。

几化：多少，多么。

辣末生头：突然。

白相官：玩具。

转载请注明：http://www.dongyamedia.com/zzyz/14831.html